Bankiyada ugu waaweyn Sweden ayaa bilihii la soo dhaafay waxay ku dhaqaaqeen siyaasad ay mudo 
qorshaynayeen taasoo ah in aan wax lacag cadaan ah aan la qaban ama la bixin.
Qaasatan tuulooyinka ayaa ugu daran goobaha ay arintaan si weyn u saamaysay iyadoo Bankiyada sida Swedbank, Nordea iyo SEB ay xafiisyo qaas ah oo ku yaala magaalooyinka waaweyn u sameeyeen qabashada lacagta cadaanka ah. Sababta ka dambaysa arintaan ayaa ah in ay badatay dhaca loo geysto xafiisyada Bankiyada ee lacagta cadaanka ah lagu qabto, waxaa intaa dheer in bankiyada uu qarash badan uga baxo amaanka iyo maamulka lacagta cadaanka ah.
Dadka Sweden ku nool ayaa la sheegay in 75% ay wax ku iibsadaan kaarka bankiga. Ma ahan bankiyada oo keliya balse xitaa waxaa jira dukaamo iyaga laftooda bilaabay in ay kaar keliya wax ku iibiyaan. Dukaamadaas waxaa ka mid ah shirkada isgaarsiinta ee 3. Qaar ka mid ah bankiyada ayaa waxay bilaabeen xitaa in qofka ay waydiiyaan cadeyn muujinaysa halka uu lacagta ka keenay haddii aad doonayso in aad lacag cadaan ah koontadaada ku shubato ama koonto qof kale.
Si kastaba ha ahaatee, isbedalkaan ayaan wax saamayn ah ku lahayn goobaha derbiyada lacagta lagala baxo iyo kuwo looga shubo. Qorshahaan cusub ee bankiyada ayaa dowlada qaasatan Hay’ada canshuuraha (Skatteverket) waxay u fududaynaysaa in ay ka hortagaan lacagta ku baxda suuqa madoow.
