Lacagta caruurta ee loo yaqaan “Barnbidrag” ayaa dhalisa isqabqabsi badan oo u dhexeeya 
waalidiinta maadama hooyada si toos ah loo siiyo lacagta. Aabaha ayaa lacagta la siin karaa haddii hooyada ay u fasaxdo oo keliya taasoo dhalisa dood iyo isjiijiid mararka qaar dhex mara waalidiinta.
Xisbiga KristDemokraterna (KD) ee ka tirsan xulufada dowlada ayaa soo bandhigay qorshe si is le’eg loogu qeybinayo lacagta labada waalid. Xisbiga ayaa ku tilmaamay in nidaamka hada jira uusan ahayn mid cadaalad ah. Xisbiga ayaa sidoo kale ku taliyay in lacagta waayeelka loo qeybiyo hooyada iyo aabaha. Xiliga hada la joogo ayaa qofku marka uu waayeel noqdo waxaa lacagta loogu xisaabiyaa intii uu shaqeeyay taasoo keeneysa haddii hooyadu aysan shaqeyn in ay qaadato lacag ka yar mida aabaha. Xisbiga ayaa ku taliyay in lacagta waayeelka ee aabaha laga jaro oo loo qeybiyo hooyada maadaama ay caruurta korisay.
Xisbiga KD ayaa waxa uu hada ka midyahay xisbiyada ugu taageerada yar Sweden. Waa xisbi fikradoodu ku dhisantahay diinta Kiristaanka. Waxaa cabsi laga qabaa in xisbigaan uu cod ka heli waayo doorashada baarlamaanka ee socota. Qoryaashaan uu soo bandhigay xisbiga ayaa u muuqda kuwo lagu soo jiidanayo qoysaska.
Hadaba sidee u aragtaa in lacagta caruurta loo qeybiyo aabaha iyo hooyada? Maku raacsantahay xisbiga?
