Waa su’aal marar badan ay iswaydiiyaan shacabka iyo siyaasiyiinta Sweden. Taasoo laga bixiyo jawaabo kale duwan, dadka isku sheega quburada isdhexgalka ayaa qaar waxay ku doodaan in Soomaalidu ay ka yimaadeen wadan burburay, qaar kale sida Per Brinkemo waxay sheegaan in Soomaalidu aysan ahayn dad aan wax qori jirin oo qabiil ku dhisan. Halka qaar kale ay eeda dusha ka saaraan dowlada Sweden. Cunsuriyiintu iyagu waxay leeyihiin Soomaalidu maba doonayaan isdhexgalka oo Islaamka ayay eeda saaraan.
Balse su’aasha ka horaysa midaan ayaa ah horta ma adagtahay in Soomaalidu dhex galaan bulshada? Maxaase lagala jeedaa erayga isdhexgal? Aniga aragtidaydu waa in uusan isdhexgalku adkayn haddii aan fahano micnaha iyo muhiimada isdhexgalka. Laakiin arinta culeyska leh ayaa ah turjumaada kala duwan ee laga bixiyo isdhexgalka.
Dadka qaar ayaa ku micneeya in ay tahay qaadashada dabeecadaha iyo dhaqanka Swedishka. Qaar ayaa iyagu isaga baxay diinta Islaamka iyagoo ku doodaya in taasi ay isdhexgal tahay. Anigu waxaan u arkaa isdhexgalka in uu yahay isku filaasho sida in qofku uu shaqaysto, ganacsi furto, luuqada barto ama waxbarasho heer sare u gudbo. Qofkii intaa sameeyay waa maxay isdhexgalka ka dhiman?
Haddii isdhexgalka ay qeyb ka tahay in aad la saaxiibto Swedishka, la xiriirto dariskaaga iwm taasi ma xuma balse Swedishka laftooda ayaan samayn. Iyaga ayaaba ah dadka aduunka ugu xirxiran marka laga hadlayo isdhexgalka nuucaas ah. Swedishku waa dad furfurma marka ay qamriga cabaan, qofkii doonaya in uu xiligaas la saaxiibo, waa in uu kula kulmaa kalaabka balse taasi maku haboontahay qofka Muslimka ah?
Sidee kula tahay adiga? Ku darso fikradaada iyo taladaada…
