Hay’ada la socodka maaliyada ee Sweden (Finansinspektionen) ayaa lagu eedeeyay in ay
sharciyada si adag u fasiratay oo ay taasi sabab u noqotay in shirkado badan oo xawaalado ah aysan u suurto galin ay hawshooda qabsadaan.
Mudanaha Soomaaliga ah ee ka tirsan baarlamaanka Sweden Amir Adan ayaa Hay’ada ka dalbaday in ay cadeyso sida sharciyada loo turjumayo, isaga oo sheegay in sharciga oo si adag loo fasiray ay keentay in fursado shaqo oo badan ay lumaan.
ilaa bishii Augusti ee sanadkii 2010 ayaa Finansinspektionen waxay si joogto ah ogolaansho u siin jirtay dadka doonaya in ay furtaan xawaaladaha iyada oo shuruuda keliya ahayd in aysan diri karin ka badan 3 milayn oo yuuro bishii balse ka dib ayaa waxaa soo baxay sharci adag oo sidii doono loo fasiran karo.
Sababta ka dambeysay sharciga cusub ayaa ahayd in laga hortago waxa loogu yeero maalgalinta argagixisada iyada oo ay Finansinspektionen dalbatay in shirkaduhu ay baaritaan sameeyaan sida in la waydiiyo qofku meesha uu lacagta ka keenay iyo in la xaqiijiyo cida uu u dirayo. Inta aan sharciga adag la soo saarin ayaysan jirin cid diidmo la siiyay balse markii sharciga soo baxay ayaa ilaa hada waxaa la diiday 51 shirkadood iyadoo 42 ogolaanshihii lagala noqday.
Shirkadaha dhibaatadaan ku dhacday ayaa waxaa ka mid ah shirkada Olympic Money Transfer oo loo diiday ogolaashihii. Ali Hassan oo ah wakiilka shirkada ee halkaan ayaa wargeyska Dagens industri u sheegay in uusan fahmin sababta loogu diiday sharciga.
Finansinspektionen ayaan dooneyn in ay si faahfaahsan uga hadasho markii wax laga waydiiyay sababta ay ugu diideen Olympic in ay shaqeeyaan balse waxay sheegeen in ay aaminsanyihiin in shirkadaan aysan iyadu hawsha qabaneyn ee shirkado kale ay adeega qabanayaan. Sababta ugu weyn ee shirkadaha loogu diiday sharciga ayaa ah in ay aaminsantahay Finansinspektionen in aysan shirkadahaan samayn karin baaritaan ku filan cida lacagta loo dirayo.
“Shirkadu waa in ay waydiisaa halka lacagtu ka timid, waa in ay soo sheegtaa lacagaha laga shakiyo iyo in aqoonsiga la waydiiyo macaamiisha. Sababta ugu badan ee shirkadaha loogu diido ogolaanshaha waa in aysan ku wanaagsaneyn baaritaanka la xiriira lacag dirista” ayay tiri Therese Malmberg oo ka tirsan Finansinspektionen.
Amir Adan ayaa hada doonaya in Finansinspektionen ay wax ka badasho sida ay shirciyada u fasirto isla markaana ay cadeyso qaabka ay u shaqeeyaan.
“Finansinspektionen waxay bishii augusti si kadis ah u bilaabeen in ay sharciyada u fasiraan si ka duwan sidii hore iyaga oo aan wargalin sameyn. Shirkadahaan waxay lacag badan ku bixiyeen sidii ay u qancin lahaayeen sharciga hayda balse ilaa hada ma bilaabi karaan shaqadooda. Waxaa loo baahanyahay in si degdeg ah loo cadeeyo sida hawshu u socoto. Sida ay maanta tahay Finansinspektionen kuma socoto ujeedada laga lahaa sharciga Lacag dirista” ayuu yiri Amir Adan.
