Bilihii la soo dhaafay waxaa soo if baxay in Bankiyada qaarkood ay koontooyinka ka xireen qaar ka mid ah xawaaladaha Soomaalida, iyagoo sabab uga dhigay in aysan xaqiijin karin cida qaadatay lacagaha ay diraan dadka Soomaalida. Isla markaana cabsi ka qaba in lacagtaas ay gacanta u gasho argagixisada. Bankiyada xawaaladaha ka xiray koontooyinka waxaa ka mid ah Swedbank oo xitaa diiday in ay diraan lacagaha deeqda ah ee Sweden ay siiso jaaliyadaha iyo ururada Soomaalida. Arintaan ayaa cabsi weyn ku abuurtay Soomaalida ku nool Sweden iyo xawaaladaha in dhamaan bankiyada ay koontooyinka ka xiraan xawaaladaha, oo ay istaagto lacagta biilasha ee loo diro Somalia.
Wargeyska Aftonbladet ayaa maanta waxaa lagu qoray baaq ku wajahan dowlada Sweden, kaasoo ay soo qoreen xubno isugu jira xildhibaano ka tirsan baarlamaanka Sweden oo kala ah Amir Adan iyo Arhe Hamednaca iyo Mussie Ephrem oo ka tirsan Hay’ada Forum Syd iyo Erik Wahlberg oo ah qareen ku taqaqusay arimaha dhaqaalaha. Waxay ka warbixiyeen muhiimada ay leedahay lacagaha loo diro Somalia, iyagoo ka dhawaajiyay in Soomaalida ku nool Sweden ay sanadkasta Somalia u diraan 500 milyan oo karoon oo haddii la joojiyo saamayn weyn ku yeelanaysa boqolaal kun oo qof oo Soomaali ah. Waxay sidoo kale xaqiijiyeen in shirkadaha xawaaladaha Somalida ee ka hawl gala Sweden ay dhamaantood haystaan ogolaasho ay bixisay Hay’ada la socodka lacagaha (Finansinspektionen) isla markaana ay si sharci ah u shaqeeyaan.
Waxay ugu baaqeen dowlada Sweden in ay soo fara galiso arintaan, oo ay wadahadal la furto bankiyada, iyo xawaaladaha si loo helo xal joogto ah oo looga fogaado in ay istaagto lacagaha loo diro Somalia. Waxay Sidoo kale ugu baaqeen dowlada in ay la shaqayso dowladaha kale iyo hay’adaha caalamiga ah sida EU-da iyo Bankiga Aduunka si xitaa loo xaliyo dhibaatooyinka midaan la midka ah ee ka jira wadamada kale.
